Gasladärne

Helgemooler

Dario Natali

Es schmuust der Carla Bruni ihre alte Maa
so wie me dääglig gseht mit dr Angelika.
nd dorum zwyfle mir - was jo zimmlig schlimm isch,
ob das Buscheli - wirgglig no vo ihm isch.

Wo mir vor kurzer Zyt, prezis am Hailigoobe,
das hälli Ding entdegge, deert am Himmel oobe.
Hänn mir ys gwünscht as äs in Richtig Süde fliegt,
und s denn der Constantin - uf sy Biire griegt!

Dr Herr Wulff, wo jetzt nach langem ändlig goht,
het uns vor kurzer ZZyt no ganz massiv bedroht.
Wenn mir dä Värs dien singe, miesse mir das biesse
Denn liess är alli Dytsche Gränze z Basel schliesse!

Fir em Hanspi Gass sy Abschiid dien mir dängge
ihm e bunte Struuss mit vyle Blueme z schängge.
S het alli Farbe drinn und vyli au in blau,
und sälbverständlig lila Rosen au.

Unsri Frau Wänger isch e praktisch dänkends Wääse.
Si het vom Undergang vo unserer Aerde glääse.
Si findeds guet, denn däwäg miess si nümm draa dängge,
was si de Änkelkinder kennt uf d Wiehnacht schängge.

Jetzt duet me d Stroossemuusigkante bees beschnyyde.
Die arme Sieche sinn jo sunscht scho nid z benyyde.
Vor allem die mit ihrer überlutte Stimm.
Drumm heert me d Strigedde in Zuekunft woorschynts nimm.

As der Hakan jetzt zu Bellinzona goht,
isch e Schritt wo woorschynts numme är verstoot.
Är haig halt gmaint, und dorum mien mir ihn belehre,
Bellinzona wurd scho zu Italie gheere!

Im Huus vom Bau-Dep solls e Luxus-Hotel gää.
Basel Tourismus duet das gärn entgege näh.
Do sait dr Wessels wo bis jetzt no deert duet huuse
Do haig är immer uusgezaichnet kenne pfuuse!

Dr Hildebrand isch wägg, dr Grübel duss
und d Gigi Oeri die hert uff, dr Cuche macht Schluss.
Jetzt hätt ys gopferdeggel ebbis wunder gno:
Isch denn eigentlig dr Morin Guy no do ?