Gasladärne

Helgemooler

Christophe Stürzinger

Jetzt hett d Migros schnäll der Denner ibernoo.
Und der Carefour wird mit COOP zämmegoo.
Well das mit däne Fusione grad so lauft,
het sich au d Strigedde an d SVP verkauft!

Wenn mir denn uuse göhn, denn hebet Eyer Ässe.
Es kennt jo sy, as mir uns pletzlig dien vergässe
und unsri CD dur die ganzi Baiz dien schmeisse,
wie sälle Muusigstar - wie het jetzt dä au gheisse?!

Unsri Frau Wänger, wo jetzt 80 worde isch,
isch voller Lääbesfraid und wirggt au sunscht no frisch.
Si hett e Draum und hofft es wurdi ihre glinge,
mit der Micheline Calmy-Rey als Duo z'singe.

Mir sinn halt scho e bitz entdüscht vom Harry Potter.
Well mir der Mainig sinn, als Zauberlehrling sott er
doch au e Trick in syner Zauberdäsche ha,
as me sy Buech au z Basel znacht verkaufe kaa.

Der Marco Streller, Benny Huggel, David Däge,
sinn, wie me gseh ka fir der FCB e Sääge.
Jetzt hoffe mir as die au noch der EM blyybe,
well das drei Nämme sin, wo mir au kenne schryybe.

Das mit em Klimawandel macht ys scho no Kummer:
Kai rächte Winter me, vergässet au der Summer.
As aber d Gletscher däwääg vor sich aane schwitze,
isch jedem klar - wenn so vyyl Blutti uf em sitze.

Well alli Loggifiehrer straigge bi de Schwoobe,
hersch si vo Lörrach bis uf Hamburg uffe toobe.
Nur uns do z Basel duet das überhaupt nid steere:
so blyybe d Schwoobe ändlig so si aane gheere!

Der Herr Vasella, so dien d Zyttige betoone,
verdient schynts wider ganz e Huffe Millioone!
Das ka nid meeglig sy, drum gsehn mir das esoo:
Die het är nid verdient - die het är aifach gnoo!

Bevor die Zyttigsständer dusse dien vergammle,
hänn mir ys gsait mir sotte die go zämmesammle.
Denn hänn mir zerscht bi jedem s "CH" aabegnoo
und alli Pünggt soll jetzt der EHC bikoo!

Mir hänn ys gfroggt ob mir e Blochervärs wänn bringe.
Denn hänn mir dänggt, es wird e jede Bangg ain singe.
Und wenn e jede Bangg sy Blochervärs will singe,
hänn mir ys gsait - mien mir nid au no aine bringe!